Nagduso na og petisyon sila House Senior Deputy Minority Leader Rep. Edgar Erice ug Mamamayang Liberal Party-list Rep. Leila de Lima batok sa unprogrammed appropriations ilalom sa 2026 General Appropriations Act (GAA) sa korte Suprema kaganihang buntag.
Una na nga gibutyag nga kumpiyansa ang Malacañang nga makalusot sa legal nga pagsusi ang 2026 General Appropriations Act (GAA) bisan pa sa plano sa pipila ka magbabalaod nga idulhog kini sa Korte Suprema.
Matod ni Presidential Communications Office (PCO) Usec. Claire Castro, may katungod si Congressman Edgar Erice ug uban pang mga magbabalaod nga moduol sa Korte Suprema kon nagtuo sila nga adunay bahin sa 2026 budget nga supak sa Konstitusyon, ilabi na ang unprogrammed fund appropriations.
Bisan pa niini, sumala ni Castro, human sa hugot nga pag-review ug pagtuon sa Malacañang, nagpabilin ang lig-on nga baruganan sa administrasyon nga walay gilapas nga balaod ang 2026 budget.
Dugang pa niya, andam ang administrasyon nga dipensahan ang proposed budget kon kini moabot sa Korte Suprema.
Matod pa ni Castro, gikonsidera ang 2026 GAA nga labing limpyo ug labing maayong bersyon sa national budget.
