DAVAO CITY – Gikumpirma sa Department of Health 11 nga anaa sa 17 ang kumpirmadong kaso sa sakit nga pertussis kon hutoy, gawas sa 49 ka mga suspected cases niini sa Davao Region.
Sumala ni Dr. Janis Olavides, ang National Immunization Program Medical Coordinator sa DOH 11, dunay natalang 4 ang nakabsan sa maong sakit.
Dugang pa nga sagad sa mataptan niini ang anaa sa 6 hangtod 14 weeks old nga mga masuso.
Ang pertussis kon hutoy ang usa ka respiratory disease nga mapasa pinaagi sa pag-ubo ug paghatsing.
Naggagikan kini sa kagaw nga Bordetella pertussis kon Bordetella parapertussis, nga nagsugod sa mild cough and cold nga mulungtad og 2 ka simana.
Kon dili matambalan, magresulta kiini sa kamatayon tungod sa kumplikasyon sama sa apnea kon ang pag-undang sa ginhawa, kumbulsyon o pulmunya sa mga bata.
Gawas sa hustong disinfection ug pagsul-ob og face mask aron mapukan ang kagaw, gikanayon sa DOH nga matambalan ang maong sakit pinaagi sa pagpabakuna og “pentavalent” vaccines sa mga bata nga nag-edad og 6 weeks, 10 weeks ug 14 weeks old.
Libre sab kini nga makuha gikan sa mga health centers. Sumala sa ahenya, lauman sab ang pag-abot sa 3 million doses sa “pentavalent” vaccines nga magamit dili lamang sa pertussis, kun di sa ubang sakit sama sa diptheria, tetanus, hepatitis B, ug influenza type B virus.
Sumala sab sa nasyonal nga datos sa ahensya, miabot na sa 35 ang kumpirmadong patay sa nasud gumikan sa maong sakit.
via || Bombo LJF
