DAVAO CITY – Mopahimutang ang Department of Environment and Natural Resources (DENR) ug permanente nga monitoring team aron sa pagseguro nga ang mga gihan-ay nga mga sumbanan hugtanon nga napatuman.
Kalakip sa mga bag-ong sumbanan ubos sa camp management ang pagdili sa ilimnong makahubog, pagpanigarilyo, ug ang pagkatulog sa peak atol sa kagabhi-on.
Ang mga trekkers, kinahanglan lamang nga mobisita sa peak ug mokuha ug hulagway ug mobiya sa dapit sa dili pa ang kagabhi-on.
Sa subling pag-abli sa Mount Apo, ang mga mountaineers makahimo sab sa pagtabang sa pagseguro nga wala’y illegal activities nga mahitabo ug kinahanglan nga i-report gilayon sa DENR kung duna man.
Dili sama kaniadto nga Daghanan nga mga climbers ang ginatugtan nga mosaka, ang PAMB nagkauyon sa paglimita sa ihap sa mga trekkers ngadto sa 50 matag entry point. Tumong niini nga i-regulate ang ihap sa mga climbers aron sa pag-preserba sa bukid.
Tanan nga mga masinupakon pabayron ug multa nga P2,000 ka pesos sa matag pagsupak.
Niadtong Marso 26, 2016, gibana-bana nga mokabat ngadto sa 111 ektaryas nga kasagbotan ug kalasangan sa Mt. Apo ang gilamoy sa sunog nga mugna sa irresponsable nga mga trekkers nga mibilin ug wala napalong nga kalayo.
Ang nahisgutan nga grassfire kapin bulan ayha napalong sa mga kabomberohan ug sa mga fire volunteers.
