Hinay-hinay na nga nahuman ang gikutod nga mga permanent shelter sa Brgy. Elizalde, Maco, Davao de Oro alang sa mga biktima sa natigayong landslide kaniadtong bulang pebrero ning tuig kasamtangan.
Alayon niini, nagpaabot og pasalamat si Governor Dorothy Gonzaga sa Department of Environment and Natural Resources XI, Philippine Coconut Authority, Penro, LGU Maco, Brgy. ELIZALDE, Maco ug sa uban pa nga mga ahensya nga mitabang nga mapahiluna ug maplastar ang usa sa mga Permanent Relocation Housing sites. Sumala pa sa opisyal, daghan pang angay lihokon ug pagatukoron alang sa labing nanginahanglan niini.
Kahinumduman nga aduna nay gi-assess nga duha ka mga relocation sites ang Mines and Geosciences Bureau XI alang sa mga biktima sa pagdahili sa yuta sa Brgy. Masara, Maco, Davao de Oro nga nahimutang sa Brgy. Panibasan ug Barangay Calabcab sa susamang munisipalidad.
Ning kasamtangan, temporaryo usa gipapuyo lagyo sa mga landslide prone areas ang mga biktima samtang ginapangitaan pa og pwde nilang mapuy-an ug ginahuman pa ang ginatukod nga permanent shelter.
Dakong tabang matud pa ang katukoran niini aron makuhaan ang kasakit ug kalisod nga ilang nabati human sa nahitabong insidente kaniadtong bulan sa pebrero ning tuig kasamtangan nga maoy hinungdan sa pagkamatay sa dul-an usa gatus ka mga indibidwal.
