DAVAO CITY – Gihatagan ug perfect “10” rating sa lokal nga kagamhanan si Davao City Police Office (DCPO) Director, Col. Kirby John Kraft kalabot sa iyang gihimong pagdumala sa kapulisan sa dakbayan kini dungan sa iyang pagbiya na sa katungdanan.
Gani gitawag pa nga pandemic director si Kraft gumikan kay nahimong dakong hagit ilalom sa iyang liderato ang pagpatuman ug hugtanon nga mga sumbanan sa coronavirus disease 2019 (Covid-19) restrictions ug protocols bisan kadtong wala pay bakuna ang dakbayan.
Una ng gipahigayon ang turn-over of command ceremony sa kagahapon sa DCPO grounds tali sa outgoing city director ug ang mohulip sa iyang katungdanan nga si Acting City Director, Col. Alberto Lupaz.
Kahinumduman nga gipahimutang isip DCPO director si Kraft kaniadtong October 2019.
Samtang gipahimangnoan si Lupaz, kalabot sa tulo ka mga butang nga pangayuon sa mga dabawenyo gikan kaniya.
Kini gilangkuban sa highest standard nga pagserbisyo sa mga kapulisan dinhi sa dakbayan.
Ikaduha, kinahanglan nga dili malambigit ang mga police personnel sa bisan unsa man nga klase sa aktibidad ug ang ikatulo, angayan nga walay ‘padrino system’ ngadto sa mga police personnel.
Hinuon gipasalig ni Lupaz nga iapdayon niya ang mga adbokasiya ug programa sa iyang gihulipan nga opisyal alang sa interes ug kaayuhan sa publiko.
Una ng nasayran nga si Lupaz mao ang kanhi director sa Davao Del Sur police provincial office ayha nahimong DCPO city director.
