DAVAO CITY – Kasamtangang ginahan-ay na ni Davao City Third District Councilor Enzo Villafuerte, chairman sa Committee on Civil, Political and Human Rights, ang mamahimong penalties sa gisugyot niining ordinansa nga mao ang Anti Bullying Ordinance of Davao City.
Kahinumduman nga giduso sa konsehal sa 20th City Council ang maong sugyot ordinansa niadtong nakalabay nga bulan sa Hulyo. Ang nahisgutang ordinansa ang nagtumong sa pagpalig-on sa kasamtangan nga nasudnong balaod nga nailhang Republic Act 10627 o Anti-Bullying Act alang sa pagprotekta sa mga kabatan-onan nga enrolled sa kindergarten, elementary, secondary schools ug learning centers.
Lakip sa mga mipartispiar atol sa pipila na ka mga gipahigayong committee hearings mao ang Department of Education 11 (DepEd 11), Commission on Higher Education (CHED), ug Association of Guidance Counselors. Subay niini, dako ang paglaum ni Villafuerte nga sa dili pa muabot ang bulan sa Nobyembre diin ipahigayon na ang full-blown face to face classes, hingpit na kining maaprubahan.
