DAVAO CITY – Daku ug kahimo-an ang Pederalismo nga matang sa kagamhanan alang sa balanse nga dagan sa ekonomiya sa mga rehiyo ug lalawigan sa nasod, sama sa Mindanao.
Kini ang gihatagan ug pagtagad ni Dr. Adrian Tamayo, tigpamaba sa Mindanao Development Authority uban sa pagkanayon nga ang 1987 nga konstitusyon sa nasod nagasuporta lamang sa usa ka unitary nga porma sa panggamhanan.
Kini ang unang rason nga angayan una nga mopanday ug batakang balaod nga mosuporta sa Pederal nga matang sa panggamhanan.
Ubos sa unitary form of government mamahimo gayud nga langan ang paglambo sa mga dapit nga halayton gikan sa sentro.
Permamente gayud nga pilde ang Mindanao ug dili mahatagan ug malungtaron nga sulbad ang rebelyon gawas lamang kung kahatagan ug kahigayonan ang pederalismo nga matang sa panggamhanan.
Kini gumikan kay dili na man mag-agad sa sentrong panggamhanan ang pagpundo ug pagpatuman ug mga programa ubos sa pederal nga matang sa panggamhanan.
