Nagduso na sa iyang irrevocable resignation si Acting PCO Secretary Cesar Chavez.
Sa statement nga gipagawas ni Chavez, nasayran nga February 5 pa niini giduso ang resignation letter.
Ang pamahayag ni Chavez naglakip sa pagbiya nga may pagmahay, gumikan, gibati sumala pa niini nga wala niya nabuhat ang iyang katungdan nga sakto.
Taliwala niini, gihulagway ni Chavez nga sa matag adlaw sa iyang pagserbisyo gikonsidera niini nga iyang ulahing adlaw na, nga nagpasabut nga gihatag sumala pa niini ang tanan.
Gipadayag usab ni Chavez ang iyang kinasingkasing nga pasalamat ngadto kang Presidente Ferdinand R. Marcos Jr. alang sa kahigayonan ug dungog sa pagserbisyo niini sa administrasyon ingon man sa pagsalig nga gihatag kaniya.
Gibutyag ni Chavez nga magpabilin kini sa PCO hangtod sa Pebrero 28 o posibleng mas sayo pa, sa higayon nga makakuha na ang Palasyo og kahulip sa PCO.
Gipasalig ni Chavez nga magpabilin kini nga supporter sa administrasyon nga Marcos samtang, nagasubay sa bag-ong dalan gawas sa gobyerno, apan matud niini nga magpabilin gihapon kini sa natad sa serbisyo publiko.
Sa laing bahin, aduna migawas nga mga storya ang kanhi TV reporter nga si Jay Ruiz maoy napili nga hulip kang Sec. Chavez sa pagpangulo sa PCO.
Hinuon wala pa’y opisyal nga pamahayag ang Malacañang kalabot niini.
