Gitubag ni Philippine Coast Guard (PCG) Spokesperson Commodore Jay Tarriela si Davao City First District Representative Paolo “Pulong” Duterte human kini mupatik sa plano sa gobyerno nga tugotan ang pagbutang sa US military assets, lakip na ang Typhon missile system, sa teritoryo sa Pilipinas.
Sa iyang social media post, giingon ni Tarriela nga ang mga pahayag ni Duterte nagpasamot lamang og paranoia ug sayop nga panglantaw bahin sa defense partnerships tali sa Pilipinas ug Estados Unidos nga gikinahanglan aron mapanalipdan ang soberanya sa nasud.
Matud pa ni Tarriela, wala magpasabot og pagpanghambog ang gisulti ni AFP Chief of Staff Gen. Romeo Brawner Jr. kabahin sa abot sa Typhon missile system nga makadangat pa sa teritoryo sa China. Kini, sumala pa niya, usa ra ka teknikal nga pagpangatarungan, ug dili pasabot nga panggubot o pagpanghulga sa bisan unsang nasud.
Dugang pa ni Tarriela, ang pahayag ni Duterte murag depensa sa China, tungod kay kini pareho sa mga tingog nga nagpakunot sa agresibong lihok sa Beijing batok sa mga Pilipinong mangingisda ug tropa sa West Philippine Sea (WPS).
Nahinumduman nga si Rep. Duterte anak ni kanhi Pangulong Rodrigo Duterte, nga kaniadto mi-uyon sa mas duol nga relasyon sa China, usa ka polisiya nga gibalhin ni Pangulong Ferdinand Marcos Jr. pinaagi sa mas lig-on nga alyansa sa US ug pag-aproba sa joint patrols ug deployment sa US missile systems.
Ang maong desisyon, bisan gisuportahan sa ubang opisyal sa depensa, gikalagotan sa China nga padayon nga nag-angkon sa tibuok kadagatan sa West Philippine Sea bisan pa sa 2016 arbitral ruling nga klarong mipabor sa Pilipinas.
