Hugot nga ginamonitor sa Philippine Coast Guard (PCG) ang aktibidad sa Chinese Coast Guard Vessel 5901 o nailhan usab nga “monster ship” human kini namatikdan bahin sa Capones Island sa Zambales.
Sumala pa ni PCG spokesperson sa West Philippine Sea, Commodore Jay Tarriela, nga human niini makompirma ang presensya sa monster ship, dali niini nga gi-deploy ang BRP Cabra (MRRV-4409) uban ang duha ka helicopter sa lugar sa Capones Island.
Nadetect ang presensya sa “monster ship” pinaagi sa Dark Vessel Detection system gikan sa Canada.
Gipahayag sab ni Tarriela nga nagapadayon ang paghatag og “challenge” sa BRP Cabra ug sa PCG aircraft ngadto sa CCG-5901, diin gipasiugda niini nga adunay matud pa katungod ang PCG gumikan anaa kini sulod sa exclusive economic zone sa Pilipinas subay sa Philippine Maritime Zones Law ug UNCLOS.
Gisiguro usab ni Tarriela nga magpabilin ang hugot nga pagmonitor sa Chinese Coast Guard vessel aron masiguro nga magpadayon ang mga mangingisda sa Pilipinas sa ilang panginabuhian ug dili kini mahadlok sa harassment gikan sa mga barko sa China.
