DAVAO CITY – Gitino sa Chief Petty officer sa Philippine Coast Guard (PCG) Davao nga si Chris Rasa nga bisan gipailalom sa signal number ang usa ka lugar gumikan sa daut nga panahon, wala pa gihapon kini nagpasabot nga dili na sa pabiyahi-on ang mga sakyanang pandagat ilabi na kadtong motabok sa pikas isla.
Sumala sa nahisgutan nga maniid una sila sa sitwasyon sa baybayon ug kung anaa pa sa maayo ang kahimtang sa panahon, mamahimo pa nila nga tugtan nga mobiyahe ilabi na kadtong anaa lamang sa 15 minutos ang gilay-on niini.
Kung mamatikdan sab sa coast guard nga taas ang balud ug wala pay gipagula nga kamandoan, gilayon sab nila nga ihunong ang pagbiyahe.
Gitataw sab niini nga otomatiko sab nila nga did-an nga makapangisda ang mga mananagat sa higayon nga aduna na nay pagsaka sa balud sa kadangatan lakip na ang mga barko kini aron nga dili mabutang sa risgo ang ilang kinabuhi.
