Gibutyag ni Presidente Ferdinand “Bongbong” Marcos Jr. kaniadtong Biyernes,Agusto 8, 2025 nga ang desisyon sa Korte Suprema nga nagdeklarar nga dili konstitusyonal ang mga artikulo sa impeachment batok kang Bise Presidente Sara Duterte wala’y kalabotan sa merito sa kaso.
Matod pa ni Marcos, ang lihok sa Korte Suprema gibase sa procedural nga isyu ug dili sa sulod o merito sa reklamo.
Iyang gipatin-aw nga ang desisyon sa Korte Suprema dili nagpasabot kung husto o sayop ang mga akusasyon sa impeachment case.
Wala kini magpasabot nga walay nahimong sala, ug wala usab kini magpasabot nga adunay kamalian. Ang giingon lamang sa korte mao nga wala kini nadumala sa hustong pamaagi.
Gipasabot usab sa Presidente nga wala siya’y papel sa proseso sa impeachment batok sa Bise Presidente nga iyang kauban sa pagdagan sa 2022 nasyunal eleksyon.
Gihulagway niya nga siya usab usa ka opisyal nga mahimong ma-impeach, busa dili siya mahimong mosalmot sa bisan unsang lakang may kalabotan niini.
Matod pa niya, ang nagahimo sa desisyon mao ang Korte Suprema, Senado, ug House of Representatives, ug ang Korte Suprema na mismo ang miuyon sa katapusang desisyon.
Kahinumdoman nga niadtong Miyerkules,Agusto 6, 2025 mibotar ang Senado nga ibalhin sa archives ang mga artikulo sa impeachment batok kang Duterte human sa desisyon sa Supreme Court nga pagdeklara nga kini dili konstitusyonal.
Gipasabot sa Korte Suprema nga nalapas kini sa one-year bar rule nga gilatid sa Article XI, Section 3(5) sa Konstitusyon.
Nakita usab sa SC nga kini nalapas sa katungod ni Duterte sa hustong proseso.
Sa laing bahin, nanawagan si VP Sara Duterte nga respetohon ang desisyon nga gihimo sa Senado.
