DAVAO CITY – Gitudlo isip pinakaunang District Director sa gitukod nga Metropolitan Davao Police District PRO11 si Police Brigadier General Alexander Camilon Tagum, nga maoy modumala sa kapulisan sa jurisdiction sa Metropolitan Davao Development Authority kon MDDA.
Sumala kang Police Major/ Atty Eudisan Gultiano, anaa palang sa transition period ang pagtukod sa istruktura sa Metropolitan Davao Police District ug gilaumang makompleto ug mapatuman kini karong sunod tuig.
Gipaklaro usab sa opisyal nga dili mawala ang Davao City Police Office kundi mapailawom lamang kini sa Metropolitan Davao Police District.
Sa karon gipaabot pa ang resolution gikan sa National Police Commission alang sa mamahimong staff ang structure sa MDPD.
Kahinumdumang niadtong bulan sa abril ning kasamtangan, gipirmahan ni kanhi Pangulong Rodrigo Duterte ang Republic Act 11708 o “An Act creating Metropolitan Davao Development Authority, sa tumong nga mapalambo pa ang ekonomiya sa rehiyon. Sakop sa Metropolitan Davao ang Davao City; Panabo City, Tagum City ug Island Garden City of Samal sa Davao del Norte; Digos City sa Davao del Sur; Mati City sa Davao Oriental; ug lungsod sa Sta. Cruz, Hagonoy, Padada, Malalag, ug Sulop sa Davao del Sur, Carmen sa Davao del Norte, Maco sa Davao de Oro, Malita ug Sta Maria sa Davao Occidental.
Kagahapon, nag courtesy call na si Police Brigadier General Alexander Camilon Tagum ngadto sa mga LGU mayors nga sakop sa iyang dumalahong Metropolitan Davao Police District.
