Gikumpirma ni Palace Press Officer USec. Claire Castro nga motambong si Pangulong Ferdinand Marcos Jr. ug First Lady Liza Marcos sa lubong ni Pope Francis karong umaabot nga Sabado sa Vatican. Sumala pa ni Castro, personal nga nagpahayag ang Pangulo nga moadto siya uban sa iyang asawa.
Wala lamang gibutyag kung kanus-a ang biyahe nila paingon sa Vatican. Kahinumduman nga subay sa iyahang naunang pamahayag, giila ni Pangulong Marcos si Pope Francis isip “the best pope in his time.” Gibutyag usab niini nga naghiusa usab ang Pilipinas sa kagul-anan uban sa tibuok Roman Catholic community sa kalibutan sa pagkamatay sa Santo Papa.
Gipasidunggan sa Pangulo ang Papa isip usa ka taong mapahiubsanon, mapinanggaon, ug adunay lawom nga pagtuo. Giila niiini si Pope Francis nga adunay kasingkasing nga abri alang sa tanan, ilabi na alang sa mga kabus nga mga katawhan. Matod pa niini, “Gitudluan kita ni Pope Francis nga ang pagka-Kristiyano dili lamang pagtoo kundili ang pagpuyo sa kalooy ug pagpakita og gugma sa isigkatawo.” Ang iyang pagka-mapainubsanon, dugang pa sa Pangulo, nakapabalik sa daghan ngadto sa simbahan.
Samtang nag-antos ang kalibutan sa kapildihan sa usa ka halangdong lider sa simbahan, gibutyag sa Pangulo nga atong pasidunggan ang kinabuhi ni Pope Francis nga naghatag og paglaum, kalooy, ug inspirasyon sa kadaghanan, ug nagpahinumdom kanato sa gugma ni Kristo nga atong sundon.
