Nihangyo si President Ferdinand Marcos Jr. og courtesy resignation sa tanan niyang mga cabinet secretaries isip lakang sa pag-calibrate sa iyang administrasyon nunot sa dili maayong resulta sa mga piniliay.
Ang Presidente nagkanayon nga panahon na nga i-realign ang gobyerno nga gipaabot sa katawhan.
Gihatagan og gibug-aton sa Presidente nga dili kini negosyo sama sa naandan tungod kay ang mga tawo nagsulti ug ang ilang gipaabut mao ang resulta, dili ang politika.
Matod sa Palasyo, ang hangyo alang sa courtesy resignation gituyo aron mahatagan ug higayon ang Presidente sa pagtimbang-timbang sa performance sa matag departamento ug pagtino kon kinsa ang magpadayon sa pag-alagad sa administrasyon sa pagpatuman sa gi-recalibrate nga mga prayoridad.
Gitataw sa Presidente nga dili kini mahitungod sa personalidad kondili mahitungod sa iyang performance. Kini nga lakang padulong sa mas naka-focus nga performance driven approach.
Ang Presidente namahayag nga ang mas gikinahanglan karon mao ang paspas nga pagpatuman sa mga importanteng proyekto ug programa sa administrasyon.
Sa laing bahin, ang Malacañang nipasalig nga dili mabalda ang serbisyo sa gobyerno nunot sa panawagan sa courtesy resignation sa mga cabinet secretaries.
Ang maong lakang sa Presidente nagtimaan sa bag-ong porma sa iyang administrasyon nga mas hait, paspas, ug hingpit nga nakatutok sa panginahanglan sa katawhan.
Dili mominos 21 ka mga Cabinet secretaries nga gipangulohan ni Executive Secretary Lucas Bersamin ang nisumiter dayon sa ilang mga resignation o nipadayag sa ilang kaandam sa pagbuhat niini.
