Gideklarar ni Presidente Ferdinand Marcos Jr. ang usa ka tuig nga State of National Calamity sa tibuok Pilipinas human sa grabe nga kadaut nga gidala ni Bagyong Tino. Ang maong deklarasyon ubos sa Proclamation No. 1077 gisunod base sa rekomendasyon sa National Disaster Risk Reduction and Management Council (NDRRMC).
Gimanduan sa Pangulo ang tanang ahensya sa gobyerno nga magpadayon sa paghatag og tabang ug pagpahigayon og mga lakang sa rehabilitasyon sa mga lugar nga grabe naapektuhan sa bagyo. Gisugo usab niya nga magkoordinar ang mga departamento ug lokal nga panggamhanan aron makahatod og dugang serbisyo, ekipo, ug ayuda, lakip na ang suporta gikan sa pribadong sektor ug internasyonal nga mga organisasyon.
Sumala sa Office of Civil Defense (OCD), 224 ka tawo na ang nakumpirmang nangamatay tungod sa Bagyong Tino samtang 109 pa ang missing. Ang Cebu maoy pinakadaghan og nahimong biktima nga adunay 158 ka patay.
Giingon sa Department of Agriculture (DA) nga mitaas sa ₱159.14 milyon ang kadaut sa sektor sa agrikultura, nga nakaapekto sa kapin 5,000 ka mga mag-uuma. Labaw pa sa 6,000 metric tons nga humay ug 3,547 ka ektarya sa umahan ang nadaut sa bagyo.
Sumala ni Press Officer Undersecretary Atty. Claire Castro, mohatag ang Office of the President og ₱760 milyon nga pondo alang sa cash assistance sa mga lokal nga panggamhanan nga grabe naapektuhan ni Bagyong Tino.
Gisugo usab sa Pangulo ang Philippine National Police (PNP) ug Armed Forces of the Philippines (AFP) nga magpabilin ang kalinaw ug kahapsay sa mga lugar nga apektado sa kalamidad. Ang State of National Calamity magpabilin nga epektibo sulod sa usa ka tuig, gawas kon kini bawi-on sa mas sayong panahon sa Presidente.
