Gitudlo ni Pangulong Ferdinand “Bongbong” Marcos Jr. ang kanhi hepe sa Philippine National Police (PNP) nga si Nicolas Torre III isip bag-ong general manager sa Metropolitan Manila Development Authority (MMDA), sumala sa Malacañang.
Ang MMDA mao ang nag-unang ahensiya nga nagdumala sa dagan sa trapiko, flood control, ug uban pang serbisyong adunay direktang epekto sa adlaw-adlaw nga kinabuhi sa mga Manileño.
Gikompirma ang maong pagtudlo ni Palace Press Officer Undersecretary Atty. Claire Castro pinaagi sa mensahe nga iyang gipadala sa mga tigbalita niadtong Biyernes.
Pipila ka bulan sa wala pa ang maong pagtudlo, miingon si Torre nga apil sa iyang mga opsyon ang sayong pagretiro human sa iyang opisyal nga pagbiya sa serbisyo sa kapulisan.
Niadtong panahona, wala pay balita mahitungod sa piho nga mga tanyag alang sa sunod niyang posisyon.
Kahinumduman nga gitangtang si Torre sa iyang pwesto isip PNP chief niadtong Agosto 25 ug gipulihan ni Police Lieutenant General Jose Melencio Nartatez Jr.
Sa pagkakaron, wala pa’y opisyal nga pahayag kon gidawat ba gyud ni Torre ang labing bag-ong pagtudlo sa Presidente.
