Gisuspinde una ni Pangulong Ferdinand Marcos Jr. ang plano nga rehabilitasyon sa EDSA aron nga malikayan ang dugang kasamok sa mga pasahero ug motorista.
Gibuhat sa Pangulo ang maong pamahayag atol sa paglansad sa “Family Fare 1+3 Promo” sa MRT ug LRT.
Matod pa ni Marcos, nga gamiton na lamang ang moderno nga teknolohiya alang sa unom ka buwan nga konstruksyon inay nga ipadayon gilayon ang tradisyonal nga proseso.
Gipadayag sab sa Pangulo nga gisiguro nilang gisuta ang epekto sa maong proyekto sa ekonomiya ug sa kahimtang sa mga mananakay sa EDSA alang sa ilahang matag-adlaw nga trabaho.
Tungod niini, iyang gimandoan ang Department of Public Works and Highways (DPWH), Department of Transportation (DOTr), Metro Manila Development Authority (MMDA), ug uban pang adunay kalabutan nga mga ahensya nga susihon pag-ayo ang plano ug maghimo og tin-aw ug epektibong mga lakang alang sa paspas ug modernong rehabilitasyon sa EDSA.
Tumong sa maong lakang mao ang mapakunhod ang mga kakulian nga posibleng masinati sa katawhan sa panahon sa konstruksyon.
Wala sab gustuhi sa Pangulo nga magdugang pa sa kasakit ug kakapoy ang mga Pilipino, busa iyahang gitinguha ang usa ka “whole-of-government approach” aron masiguro ang usa ka episyente, moderno, ug dali nga pamaagi sa pag-ayo sa EDSA.
Gipasabot usab ni Transportation Secretary Vince Dizon nga klaro ang sugo sa Pangulo nga susihon og maayo ang plano sa pag-rehabilitate sa EDSA, gumikan kay dili madawat ang duha ka tuig nga kalbaryo sa trapik, kakulangon sa oras, ug kawad-an og oportunidad alang sa mga komyuter ug motorista, hilabi na hapit na ang subling pag-abli sa klase.
Matod pa ni Dizon, nga buot sa buhatan sa DOTr nga makigtambayayong sa mga kauban nga ahensya aron matuman ang direktiba sa Pangulo nga hapsayon ug paspasan ang biyahe sa mga pasahero ug drayber.
