Gipahayag sa Malakanyang nga girespituhan ni Pangulong Ferdinand Marcos jr. ang pagpasaka ug impeachment complaint batok sa iyaha.
Alang sa Malakanyang, ang nahisgutang lakang ang kabahin sa demokratikong proseso ubos sa konstitusyon. Gipahayag sa Presidential Communications Office (PCO) nga giila niini ang katungod sa mga indibiduwal o grupo nga nagpasaka ug reklamo ug nagpadayag ug kumpyansa nga ang kongreso, isip usa ka co-equal sa gobyerno ang mulihok nga adunay kamatinud-anon, integridad ug kadungganan sa rule of law.
Dugang gipahayag sa PCO, samtang gihimo ang constitutional processes, padayon usab gihimo sa Pangulo ang iyahang katungdanan ug gipaneguro nga ang government operations ang nagpabiling walay hunong.
Una niini, gipasaka ang unang impeachment complaint batok kang PBBM ngadto sa kongreso gumikan sa pagkalambigit kuno niini sa 2025 corruption scheme nga adunay kalabutan sa unprogrammed appropriations ug uban pang isyu.
Gisubmitar ni Atty. Andre de Jesus ang reklamo sa buhatan ni House Secretary General Cheloy Garafil. Giindosar ang reklamo nila ni Deputy Minority Leader ug Pusong Pinoy party-list Rep. Jernie Nisay.
