Gimando ni Pangulong Ferdinand Marcos Jr. ang Department of Health (DOH) nga atubangon ang pagsaka sa kaso sa HIV sa nasud.
Matod pa ni Health Secretary Ted Herbosa, nga hugot ang mando ni Pangulong Marcos nga paspasan ang paghatag og serbisyo pinaagi sa mas dali nga proseso sa mga nag-unang ospital nga adtoan sa mga indibidwal nga adunay HIV.
Gipasiugda sa opisyal nga pinaagi sa maong sistema, masiguro usab ang kanunay nga pagkonsulta sa mga pasyente nga adunay HIV.
Pakusgon usab sa DOH ang ilahang kampanya aron wagtangon sa hunahuna sa katawhan ang stigma o kahadlok ug pagdumili nga adunay kalabotan sa pagkahiagum og HIV.
Subay sa datos sa DOH, adunay 57 ka mga bag-ong kaso nga natala matag adlaw sukad niadtong Enero hangtod Marso, o sa unang quarter sa tuig.
Matod pa ni Herbosa, nga tungod sa mga tambal nga anaa na karon, dili na kini makamatay nga sakit kung regular lamang ang konsultasyon ug pag-inom sa gihatag nga mga medisina.
Gumikan niini, gipakusog sa DOH ang paghatag og libre nga anti-retroviral o ARV drugs alang sa mga indibidwal nga nagpuyo nga adunay HIV.
Sa laing bahin, gibug-atan usab ni Herbosa nga panahon na aron usbon o ameyendahan ang balaod nga adunay kalabutan sa pagbatok sa HIV.
