Dismayado si Pangulong Ferdinand Marcos Jr. human madiskubre ang daghang problema sa mga flood control projects sa Bulacan.
Gisusi mismo sa Pangulo ang mga proyekto sa Calumpit ug Barangay Frances, diin iyang nakita ang mga buslot sa dike nga kinahanglan unta nga buo pa kini.
Gibutyag ni Marcos nga kinahanglan nga personal nga moadto ang contractor aron masaksihan kung unsa kalisod ang kahimtang sa mga residentem, gumikan sa palpak nga proyekto.
Nabantayan usab sa Pangulo ang halos 200 meters nga bahin sa revetment nga wala pa mahuman, bisan og gi-report sa proyekto nga kumpleto na kini.
Tungod sa mga deperensya nga nakita, gipangayoan sa gobyerno og tubag ang St. Timothy Construction Corporation, nga responsable sa River Protection Structure sa Calumpit.
Ang maong kompanya mao ang usa sa Top 3 contractors sa 15 ka kumpanyang adunay pinakadaghan nga flood control project contracts sa gobyerno. sGisusi usab sa Pangulo ang pag-inspeksyon sa ilawom sa tubig pinaagi sa mga scuba diver.
Sa pagsusi, nadiskobrehan sab nga natabunan sa gaba nga silt ang mga pader sa ubos sa concrete slope protection, hinungdan nga dili makita kung adunay pa ba kini sheet piles.
Apan sa padayong pagsuta sa mga divers, nakita nga wala na nakadikit ang beam sa sheet pile support ug adunay klarong bakante tali sa duha nga dapat unta magkadikit aron masiguro ang kalig-on sa istruktura.
Matud pa sa Pangulo, klaro nga wala nagkatandi ang aktuwal nga resulta sa PhP96 milyon nga proyekto sa nakabutang sa papeles ug sa kontratang gibayran sa gobyerno.
Wala masabti sa Pangulo og nganong nahimong ingon ani ang proyekto bisan og dako ang pondo nga gigahin sa gobyerno.
Gisiguro sab ni Marcos nga manubag ang mga contractor ug mga opisyal nga nalambigit sa maong kalihokan.
Sumala pa sa datos sa DPWH, adunay 668 ka flood control projects sa Bulacan nga nagkantidad og P6.5 bilyon, samtang ang rehabilitasyon sa River Protection Structure nagkantidad og P96.4 milyon.
