Gipasalig sa Malacañang nga dili tugotan ni Pangulong Ferdinand Marcos Jr. nga adunay mga kwestiyonableng proyekto nga masulod sa 2026 national budget.
Kini nga pahayag sa Palasyo mao ang tubag human sa pagbutyag nila House Deputy Speaker Ronaldo Puno ug Marikina Representative Marcy Teodoro nga adunay ilahang nakitang kwestiyonableng mga proyekto ilawom sa 2026 National Expenditure Program (NEP).
Partikular nga gitumbok ni Rep. Puno ang mga priority projects sa iyahang distrito nga nahanaw sa NEP.
Sumala ni Palace Press Officer USec. Claire Castro, dili gilayon hukman ang isyu.
Angayan nga makig-koordinar una ang mga mambabalaod sa Department of Public Works and Highways (DPWH) aron masuta og masabtan ang detalye sa proyekto nga ilahang gikuwestyon.
Sumala pa sa Malacañang nga magtinabangay ug mag-istorya una ang DPWH ug ang mga kongresista kabahin niini.
Gipasalig ni USec. Castro nga kung mapamatud-an nga gisulod lamang tinuod ang proyekto sa 2026 budget, dili kini tugotan sa Pangulo.
Matod pa niya, nasuko na ang Pangulo sa maong kontrobersiya gumikan ang pondo alang man unta sa katawhan.
Gidepensahan usab sa Department of Budget and Management (DBM) ang alegasyon nga ilahang gi-manipula ang national budget.
Sumala sa pamahayag ni USec. Castro subay sa DBM, gihatag lamang sa ilaha ang listahan sa proyekto ug wala kini gikan mismo sa DBM.
Gisugyot sa Palasyo nga ipresentar og ebidensiya ang mga mambabalaod, ug kung mapamatud-an nga adunay nagsal-ot sa proyekto, angay kining responsableng manubag.
Paimbestigahan usab sa usa ka Independent Commission ang giingong insertions sa 2026 National Expenditure Program (NEP).
Sa pagkakaron, gina-finalize na ang composition sa maong Independent Commission nga ilahang pormahon.
