Gipangunahan ni MinDA Secretary Leo Tereso A. Magno ang padayon nga commitment sa Mindanao Development Authority kon MinDA nga empowered ang mga mag-uuma aron makab-ot ang malungtarong panginabuhian ug mahimong competitive sa internasyonal nga merkado. Gihisgutan usab niini ang halapad nga konsultasyon kauban ang mga farmers’ associations, mga lokal nga pangagamhanan, ug mga lider sa industriya sa agrikultura aron masiguro nga ang programa makatubag sa tinuod nga panginahanglan sa yuta.
Kini ang kabahin sa gilusad nga Agri-Puhunan at Pantawid Program sa Saranggani nga nagtinguha nga mapataas ang productivity ug kita sa mga mag-uuma sa atong nasud nga gitambungan ni Pang. Marcos Jr.
Ang pagbisita ni Pang. Marcos sa Rehiyon sa SOCCSKSARGEN mao ang iyahang unang bisita alang karong tuiga nga naglakip usab sa Kadiwa ng Pangulo nga kalihokan, nga nagpakita sa mga lokal nga produkto sa agrikultura ug nagpasiugda sa direktang koneksyon sa merkado tali sa mga mag-uuma ug konsumidor.
Gawas sa APP Program, usa ka kinatibuk-ang kantidad nga Php 884.7 milyon nga mga interbensyon sa agrikultura usab ang gi-apod-apod ngadto sa 3,686 ka mga mag-uuma gikan sa upat ka probinsya. Naglakip kini sa mga kagamitan sama sa corn shellers, traktora, hauling trucks, ug mga incubator aron dugang mapalambo ang produksiyon sa uma ug kalig-on niini.
Ubos sa maong programa, mamahimong mangutang ang mga mag-uuma og puhunan nga adunay ubos nga interes ug ilahang mabayran ang ilahang utang pinaagi sa pagbaligya sa ilahang ani ngadto sa National Food Authority (NFA) o sa mga DA-accredited cooperatives.
Nasayran nga ang usa ka mag-uuma mamahimong makahulam og puhunan hangtod sa P60,000 nga adunay 2% interest rate matag tuig.
Sa panahon sa pagpangandam sa uma hangtod sa pag-ani, sumala ni Pangulo Ferdinand Marcos Jr., makadawat usab sila og pantawid nga tabang nga nagkantidad og P8,000 matag unang semana sa sulod sa upat ka buwan.
Ang kalampusan sa maong programa nahimong yawe ang Mindanao Development Authority (MinDA) nga nagsilbing coordinating ug implementing agency aron masiguro ang epektibong pagpatuman sa programa.
