Gikumpirma na sa Eastern Mindanao Command nga nakuha na nila ang unom ( 6 ) ka patayng lawas nga gilangkuban sa piloto ug mga crew sa nahagsa nga Super Huey Helicopter sa Philippine Air Force sa Loreto, Agusan del Sur.
Sa pagkakarun, padayon pa gihapon ang gihimong imbestigasyon sa Philippine Air Force aron masuta ang hinungdan sa pagkahagsa sa maong helicopter.
Una na nga gikompirma sa EASTMINCOM nga unom ang sakay sa nahagsa nga Super Huey Helicopter.
Sumala sa Eastern Mindanao Command, gituohan nga ang mga patayng lawas mao ang piloto ug ang mga tripulante nga anaa sa sulod sa aircraft sa dihang nahitabo ang aksidente.
Samtang, gitago pa sa karon ang mga pangalan sa mga namatay ug gipahibalo pa ang ilahang tagsa-tagsa ka pamilya.
Nasayran nga una na nga nadiskobrehan nga ang aircraft nawad-an og komunikasyon samtang padulong kini sa Butuan aron mopahigayon og Humanitarian Assistance and Disaster Response (HADR) operations sa wala pa ang aksidente tungod sa bagyong Tino.
Nadiskubrehan atol sa search and rescue operation sa mga otoridad sa crash site sa Loreto, Agusan del Sur ug nangasunog ang mga biktima taliwala sa mga kabukiran.
Sa inisyal nga impormasyon, nahitabo ang pagkahagsa sa Barangay Sabud, Loreto, Agusan del Sur.
Una na usab nga gikumpirma ni Eastmincom Spokesperson Lt. Col. Salvacion Evangelist nga mga personahe sa Philippine Air Force (PAF) ang mga sakay nga nahagsa pasado alas 12 sa udto kagahapong adlawa.
Una na usab nga gibutyag sa mga residente nga nakita pa nila nga miaso ang helecopter una kini nahagsa.
