Nakaplagan na ang patay nga lawas sa usa ka mag-uuma nga kini ang gituohan nga nalumos sa sapa kagahapong adlawa.
Subay sa report sa mga otoridad, giila ang biktima nga si Artemio 65-anyos nga residente sa Upper Lacson, Barangay Lacson, Calinan District, sa dakbayan sa Davao.
Subay sa imbistigasyon sa kapulisan, midangop ang asawa ngadto sa ilahang buhatan aron itaho sa mga otoridad nga ang bana niini nalumos sa sapa sa Purok 1, Barangay Dominga, Calinan District, pasado alas 10 sa buntag.
Sumala pa sa mga otoridad, mibiya ang biktima sa ilang panimalay niadtong buntag sa adlaw nga Sabado, aron nga moadto sa ilahang uma sa Purok Libongan, Barangay Lamanan, aron nga manguling apan wala na kini makauli.
Saysay pa sa asawa nga ilahang gisuwayan og pagpangita ang iyang bana apan nakita niini nga taas kaayo ang tubig sa sapa, rason nga wala na sila makatabok.
Ug dugang pa sa asawa nga atol sa ilahang pagpanubay nakita niini ang kawayang balsa nga ginasakyan sa iyang bana nga miresulta sa iyang katahap nga adunay nahitabo sa iyahang bana.
Sa ilahang pagpanubay sa maong dapit, usa ka mag-uuma ang nag-report kanila nga adunay nakita kini nga usa ka lalaki nga natabunan sa daghang gapnod nga anaa sa sapa.
Ug sa pagsubay sa asawa, gikumpirma niini nga iyahang bana nga si Artemio ang nakaplgan nga wala nay knabuhi.
