Nakaplagan sa Matina Pangi River sa Davao City ang patay nga lawas sa usa ka batan-ong lalaki, nga positibo nang giila sa iyang pamilya nga mao si Dember Pillanon, 14-anyos, residente sa Sitio Eskwela, Catalunan Grande.
Sumala sa amahan nga si Rolan Pillanon, katapusang nakita ang iyang anak sa ilang balay niadtong Enero 16, 2026 (Biyernes), apan nakurat ang pamilya pagkahibalo nga kini nakaplagan nga patay sa Km. 9, Matina Pangi, niadtong Domingo, Enero 18.
Giingon ni Mr. Pillanon nga nagtuo sila nga dunay kauban ang biktima sa dihang naabot kini sa lugar, kay dili man tingali normal nga mag-inusara ang usa ka 14-anyos nga maligo sa Matina Pangi River.
Sa pagkakaron, padayon ang pamilya ug mga awtoridad sa pagsusi sa eksaktong hinungdan sa kamatayon ni Dember, lakip na ang posibilidad sa aksidente o uban pang dili maayong panghitabo. Gisiguro sa kapulisan nga magpadayon ang imbestigasyon aron matubag ang mga pangutana sa pamilya ug masiguro ang hustisya sa biktima.
Ang insidente nagpukaw sa kabalaka sa katawhan sa daplin sa Matina Pangi River, nga nanginahanglan og mas istriktong seguridad ug monitoring aron malikayan ang samang trahedya sa umaabot.
