Narekober na ang mga patayng lawas sa tanan nga 67 ka biktima sa US mid-air collision tali sa usa ka American passenger jet ug usa ka helicopter sa US Army nga nahagsa sa Potomac River duol sa Washington D.C.
Sa pahayag gikan sa managlahi nga mga ahensya sa gobyerno nga nalambigit sa recovery effort, ilang gikompirma nga nailhanan na ang mga patayng lawas nga nakuha gawas sa usa ka tawo nga padayon pa gihapon nga ginaila.
Gitawag sa mga opisyal ang pagkompleto sa pagpangita sa mga lawas sa mga biktima nga usa ka mahinungdanon nga lakang paingon sa katapusang “closure” alang sa mga pamilya sa mga namatay sa aksidente kaniadtong Enero 29.
Sa pagka karon, nagpadayon ang mga otoridad sa pagrekober sa mga wreckage sa passenger plane gikan sa bugnaw nga tubig sa Potomac River.
Ingon man nga pipila ka mga parte sa eroplano nga nahagsa ang anam-anam na usab nakuha sa mga tripulante diin lakip niini ang right wing, center section sa fuselage, bahin sa left wing, tail cone ug rudder matud pa sa National Transportation Safety Board.
Sa bahin sa military chopper, paga-sugdan ang pagbawi niini sa higayon nga makompleto na ang pagkuha sa passenger jet.
