DAVAO DEL SUR – Naila na ang patay’ng lawas nga nakaplagan sa sagbutan nga bahin sa Prk.6, Brgy. Asbang, Matanao, Davao del Sur niadtong milabayng adlaw, alas 5:00 ang takna sa hapon.
Subay sa taho sa Matanao Police, nasayran nga midangop sa buhatan sa kapulisan si Karen Pama Lumogdang, human niya makita sa social media nga adunay patay’ng lawas nga nakaplagan sa lungsod sa Matanao.
Iyahang gikumpirma nga iyaha kining igsoon nga si Edmar Pama Lumogdang, 41 anyos ang panuigon, minyo, electrician ug residente sa Purok 4, Brgy. Poblacion, Tacurong, Sultan Kudarat.
Saysay ni Karen atong adlawng sabado pa wala na maka uli ang iyahang igsoon sa ilahang panimalay.
Gidala na sa ilahang pinuy-anan ang patay’ng lawas sa biktima.
Base sa naunang imbestigasyon sa palibot sa maong dapit, walay matud pa’y nadungog ang mga tagbalay nga adunay buto sa armas ug gumikan niini nagtoo ang kapulisan nga gipatay ang biktima sa laing dapit ug gilabay lamang kini sa nasampit nga lugar tungod sa crime scene, walay mga narekober nga mga ebidensya ang otoridad gawas lamang sa patay’ng lawas sa biktima.
Sa kasamtangan padayon pa ang ginalusad nga imbestigasyon sa kapulisan ug masubay na ang hinungdan sa pagpatay niini.
