DAVAO CITY- Padayon karong ginalusad ang lalom nga imbestigasyon kabahin sa patayng lawas nga nakaplagan sa may Bypass Road, Ulas, ning dakbayan, kagahapon sa buntag.
Sa inisyal nga imbestigasyon sa kapulisan, giila ang biktima nga si Rico Mahinay, 32 anyos, residente Sawata Davao del Norte, kinsa matud pa nakahigaom og tulo ka samad dinunggaban sa lawas partikular na sa iyang liog, bukton, ug dughan nga maoy hinungdan sa iyang hinanaling kamatayon.
Sumala pa sa katawhan nga posibleng gabii kini gipatay sa maong lugar ug igo na lamang kining nakit-an sa usa ka indibidwal pagkabuntag kinsa dayong nangayo og tabang sa niaging CTTMO Traffic enforcer gumikan sa nakaplagang patayng lawas sa may kasagbutan nga bahin.
Ning kasamtangan, nagalusad na og lalom nga imbestigasyon ang mga kapulisan kabahin sa motibo ug suspetsado sa krimen hilabi pa nga dili residente sa maong dapit ang maong biktima.
Ginapanubayan pa usab sa mga otoridad kung aduna bay CCTV sa mga kasigpit nga dapit nga makatabang sa pagresolba sa krimen.
