Misaka na sa dili moubos sa 104 ang ihap sa mga namatay tungod sa grabe nga pagbaha sa Texas, lakip ang 28 ka mga bata.
Sumala ni Larry Leitha, Sheriff sa Kerr County sa Texas Hill Country, nga maoy sentro sa grabeng pagbaha nga miabot na sa 104 ang mga kumpirmadong patay sa ilahang lalawigan, lakip na ang 28 ka mga bata.
Matod pa ni Leitha, 11 pa ka mga batang babaye ug usa ka camp counselor ang padayon pang na-missing gikan sa usa ka summer camp nga duol sa Guadalupe River, nga miawas human sa kusog nga ulan sa central Texas niadtong Biyernes, dungan sa selebrasyon sa Independence Day sa Estados Unidos.
Dugang pa niya, adunay 18 ka hamtong ug upat ka bata nga wala pa mailhi sa Kerr County.
Sumala sa mga opisyal nga niadtong Sabado, kapin sa 850 ka mga tawo ang naluwas, lakip ang uban nga nag-gunit na lamang sa mga kahoy aron maluwas, human sa kalit nga pag-igo sa daot nga panahon nga nagpaulan og hangtod 15 inches (38 cm) sa rehiyon, mga 85 miles (140 km) northwest sa San Antonio.
Sa pagkakaron, wala pa gihapon matino ang ensaktong ihap sa mga na-missing, apan sa pagkakaron padayon pa nga gipangita ang mga na-missing.
