Mas midaghan pa ang ihap sa mga namatay tungod sa pag-igo sa bagyong Tino sa Pilipinas, subay sa gi-update nga report nga gipagawas sa National Disaster Risk Reduction and Management Council (NDRRMC) kagahapong adlawa.
Sa maong report, niabot na sa 232 ka tawo ang kumpirmadong namatay. Ang probinsya sa Cebu ang nagtala sa labing daghan nga patay nga miabot og 150 ka mga tawo.
Gisundan kini sa Negros Occidental nga adunay 42, samtang 21 ka tawo ang namatay sa Negros Oriental.
Sa pagkakaron, padayon pa gihapon nga gipangita ang 112 ka mga tawo nga opisyal nga natalang nawala kon (missing).
Daghan sa ilaha ang gituohang nadala sa grabeng pagbaha o natabunan sa mga nahitabong landslide.
Niabot usab sa 523 ka tawo ang natala nga nasamdan sa pag-igo sa maong kusog nga bagyo nga misentro sa Visayas.
