Misaka na ang ihap sa mga nakabsan sa kinabuhi dinhi sa rehiyon human sa nahitabong pagdahili sa yuta kagahapong adlawa human nga adunay Usa ang natala nga nakabsan sa kinabuhi sa munisipalidad sa Pantukan, Davao De Oro. Subay sa report sa mga otoridad, nakabsan sa kinabuhi ang usa ka minero human sa nahitabong landslide sa Purok 52, Sitio Post 4, Brgy. Napnapan, Pantukan, Davao de Oro kagahapong adlawa pasado alas Otso sa buntag.
Giila ang biktima nga si Grover Mascarenas, 25-anyos nga residente sa Brgy. Pangibiran, Mabini sa nasampit nga probinsya.
Sumala pa sa imbistigasyon sa kapulisan, nahitabo ang insidente samtang anaa sa ballmilan ang biktima. Sa kinatibuk-an anaa na sa Walo ang ihap sa mga nakabsan sa kinabuhi gumikan sa pagdahili sa yuta sa duha ka mga probinsya.
Kahinumduman nga patay ang 4 ka mga myembero sa pamilya human sa nahitabong pagdahili sa yuta sa Upper Salazar, Brgy. Central, Mati City, Davao Oriental kagahapon sa buntag.
Nakabsan sa kinabuhi ang mga biktima human sa nahitabong landslide gumikan sa nagbuntag nga ulan sa maong syudad. Subay sa taho gikan sa mga otoridad, ang 4 ka mga biktima gilangkuban sa usa ka amahan, inahan ug duha ka babaeng anak niini.
Ang mga biktima nahaw-as atol sa search and rescue operations sa lugar diin nahitabo ang pagdahili sa yuta.
Nasayran nga pasado alas Siete sa buntag nahitabo ang insidente nga gilayon usab nga girespondehan sa mga rescuers.
Gisulayan pa og pagdala sa ospital ang tulo ka laing mga biktima apan wala na kini masalbar pa sa mga doktor. Giila ang mga biktima nga sila 1. Habib-Lagbawan Anting, Nhor Habiba Bantao Anting 13-anyos, Thahani Bantao Anting 5 -anyos ug Kharen Bantao Anting, 39-anyos.
Samtang sa laing bahin, natabunan usab ang usa ka panimalay atol sa pagdahili sa yuta sa Purok 5, Patin-ay, Rizal, Monkayo, Davao de Oro pasado alas Onsi Hwebes sa gabii tungod sa kusog nga bundak sa ulan.
Subay sa report sa MDRRMO Monkayo, usa ka myembro sa pamilya ang lakip sa natabunan sa pagdahili sa yuta atol sa kusog nga pabunok sa ulan. Sumala pa nga nangatulog ang mag amahan sa sulod sa ilahang kwarto sa dihang nahitabo ang pagdahili sa yuta. Gilayon usab nga gipahigayon ang search and rescue operation sa maong lugar.
Pasado ala-Una kaganihang kaadlawon, nahaw-as ang mga biktima nga gilangkuban sa duha ka mga magsuon. Samtang pagka buntag, narekober usab ang usa ka patayng lawas.
Subay usab sa gipaguwa nga impormasyon sa LGU, giila ang mga biktima nga sila Kuiper klent M. Remedio, Siete anyos, Reyjun A. Remedio Sr., Trayntay Uno anyos ug Reyjun M. Remedio Jr., Dusi anyos.
Kahinumduman nga sukad pa sa nakalabay nga adlaw nakasinati na og mga pag-ulan ang nasampit nga lugar tungod sa Shearline nga miresulta usab kini sa halapad nga mga pagbaha.
