Nakapatay na og 20 ka mga tawo ang kusog nga magnitude 6.3 nga linog nga miigo sa amihanang bahin sa Afghanistan kagahapon sa buntag.
Subay sa US Geological Survey, ang linog miigo sa Mazar-e-Sharif, nga puluy-anan sa dul-an tunga sa milyon nga mga residente, mga ala-Una sa kadlawon.
Nasayran nga adunay kini gilawmon nga 28 kilometros ug gibutang kini sa orange alert level, nga nagpasabot nga posibleng adunay daghang mga biktima.
Gikabalak-an nga mosaka pa ang ihap sa mga patay samtang nagpadayon pa ang mga rescue operations. Ang linog usab mihimo og kadaot sa 180 ka mga tawo nga naangol.
Sumala ni Haji Zaid, tigpamaba sa Taliban sa Balkh province, kadaghanan sa mga nasamdan gikan sa Sholgara district, nga nahimutang sa habagatan sa Mazar-e-Sharif.
Nakadawat sila og mga report nga adunay mga tawo nga naangol ug mga istruktura nga nadaot sa nagkalain-laing distrito sa maong probinsya.
Kadaghanan sa mga nasamdan natumba gikan sa hataas nga mga building atol sa linog.
Lakip usab sa mga nadaot ang Blue Mosque, usa sa labing bantugan nga mosque sa Afghanistan ug maoy architectural treasure sa nasud.
Kini ang nag-unang lugar sa pilgrimage, nga gituohang nahimutangan sa lubnganan ni Hazrat Ali, ang ika-upat nga kalipa sa Islam ug ugangan nga lalaki ni Propeta Mohammad.
