Padayon ang gihimong imbistigasyon sa kapulisan kabahin sa usa ka patay nga lawas sa usa ka tawo nga nakaplagan sa baybayon sa probinsya sa Davao Occidental.
Kahinumduman nga nakita na lamang sa mga residente ang patay’ng lawas sa usa ka lalaki sa baybayon sa Sitio Manando, Brgy. Camahual, Sarangani,pasado alas 6:23 sa hapon.
Gilayon kining girespondihan sa Municipal Health Office of Sarangani ug Sarangani Municipal Police Station, kauban ang Philippine National Police Maritime Group, Philippine Coast Guard, ug Municipal Disaster Risk Reduction and Management Office Sarangani (MDRRMO).
Ang patay’ng lawas gibana-bana nga anaa sa 30 hangtod 40 anyos ang panuigon, nagsul-ob og leggings, ug adunay goggles o antipara nga nakabitay sa iyang liog. Aduna usab kini tattoo nga “NI” duol sa dapit sa ilok.
Sa pagkakaron, gibutang ang maong lawas sa Sarangani Municipal Hospital sa Brgy. Mabila, Davao Occidental.
