Narekober laing upat pa ka mga patay nga lawas kagahapong adlawa sa dive site diin naunlod ang MV Trisha Krestin 3 duol sa Baluk-Baluk Island sa Basilan.
Tungod niini, miabot na sa 62 ang kinatibuk-ang ihap sa mga namatay. Sumala sa mga awtoridad, apil sa labing bag-ong narekober ang duha ka mga lalaki ug duha ka mga babaye.
Wala pa ipagawas ang ilahang mga ngalan samtang ginahimo pa ang beripikasyon ug pakiglambigit sa ilahang mga pamilya.
Una nang nakarekober ang tulo ka mga patayng lawas niadtong Pebrero 15 ug usa pa niadtong Pebrero 16 sa maong lugar, diin nagpadayon ang pagsalom ug pagpangita sa mga nahibiling lawas sa naunlod nga barko.
Nagpadayon ang search-and-recovery operations nga gipangunahan sa Philippine Coast Guard ug Philippine Navy, uban sa mga lokal nga gobyerno ug mga nagboluntaryo sa pagpangita, human sa trahedya sa kadagatan nga sakop sa Basilan niadtong Enero 26.
