Makasinati ang dakong bahin sa Pilipinas og dag-om ug ulan samtang nagsaulog og Pasko gumikan sa Shear Line ug northeast monsoon, subay kini sa ulahing gipaguwa nga impormasyon sa Philippine Atmospheric, Geophysical, and Astronomical Services Administration (Pagasa).
Sa weather forecast sa Pag-asa, gikanayon ni weather specialist Rhea Torres, nga duha ka sistema sa panahon ang magdala og ulan sa nasud, ilabi na sa habagatang Luzon ug sidlakang Visayas.
Samtang, magapadayon ang northeast monsoon sa sidlakan nga bahin sa Amihanan ug Sentral Luzon.
Matod pa ni Torres, nga adunay posibilidad nga makasinati og katamtaman hangtod sa bug-at nga mga pag-ulan gumikan sa epekto sa shear line, ang mga lugar nga Mimaropa kon Mindoro, Marinduque, Romblon, ug Palawan.
Lakip sab ang Calabarzon nga gilangkoban sa Cavite, Laguna, Batangas, Rizal, ug Quezon. Ug ang Bicol region.
Makasinati sab og pagdag-om ug hinay nga mga pag-ulan ang Cagayan Valley, Cordillera Administrative Region, ug mga kasikbit nga lugar susama sa Aurora, Nueva Ecija, Bulacan, ug Metro Manila.
Ang laing bahin sa Luzon makasinati og partly cloudy ngadto sa baga nga dag-om sa kawanangan uban ang posibilidad sa mga hinay nga pag-ulan.
Dugang pa niini, nga magapadayon ang shear line nga magdala og mga pag-ulan sa Palawan ug sa sidlakang Visayas.
Ang Palawan ug mga probinsya sa sidlakang Visayas ilabi na sa Samar ug Leyte, makasinati og mga pag-ulan nga anaa sa katamtaman hangtod bug-at nga mga pag-ulan.
Ang uban nga bahin sa Visayas ug Mindanao makasinati og mga pagdag-om sa kawanangan inubanan kini sa posibilidad sa mga hinay nga pagpanalugdog nga ginalaoman mahitabo sa hapon ug gabii.
Samtang, nagpahimangno sab si Torres nga adunay gale warning nga gipasaka sa mga baybayon sa Ilocos Norte partikular na sa Pagudpud, Bangui, Burgos, Pasuquin.
Lakip sab sa maong warning ang Amihanang ug sidlakang baybayon sa Polillo Islands ug ang Amihanang ug sidlakang baybayon sa Catanduanes, kini na mga lugar makasinati og posible nga pagsaka sa mga balod nga anaa sa 3.4 ngadto sa 4.5 ka metro.
Nagpasidaan usab siya nga ang gagmay nga sakyanan pandagat dili angay maghimo og bisan unsang aktibidad sa dagat gumikan sa nagapadayon nga delikado nga kahimtang sa dagat.
