DAVAO CITY- Wala nay kinabuhi sa dihang nakaplagan ang usa ka lalaking parlorista sulod sa iyang panimalay sa Blk 29, Lot 27 Goldland Subdivision, Bago Aplaya, ning dakbayan, kagabii.
Giila ang biktima nga si Kent Lubaton, 30 anyos, residente sa maong dapit.
Sumala pa sa mga kasilingan sa biktima nga nakita pa nila si Kent bandang alas otso ang takna sa gabii kaniadtong Hulyo 13 kauban ang trato niini samtang nag-inom.
Wala matud pa silay nadungog nga bisan unsang kasikas o kasaba atol sa maong adlaw apan naaktohan nila ang paglakaw sa trato sa biktima kagahapong adlawa.
Nasayran nga dugay nang adunay panagbangi ang duha nga miresulta pa sa pisikalay sa mga nakalabayng adlaw nga posible usab nahimong rason sa maong insidente.
Ning kasamtangan, padayon pang gina-imbestigahan sa mga kapulisan ang insidente kalakip na ang pagsuta sa responsable sa krimen.
