DAVAO CITY – Nangita karon ang Davao City Investment and Promotions Center (DCIPC) ug mga investors nga buot magpahimutang ug parking facilities sa siyudad aron nga mapatuman pag-ayo ang “No street parking” policy.
Segun ni DCIPC Officer-in-charge Lemuel Ortonio, nga daghan na siya ug nadawat nga reklamo kalabot sa mga sakyanan nga nagaparada lamang daplin sa mga kadalanan.
Gitahasan sumala pa karon ang DCIPC nga momugna ug special incentive package ngadto sa mga buot motukod ug parking facilities.
Motabang sab sumala pa ang city legal office sa pagpanday sa mga detalye sa draft ordinance. Kabahin matud pa sa maong plano mao ang pag-adjust sa gitas-on sa incentive period.
Kahinumduman nga una na sab nga nagpahimangno ang mga hingtungdan nga ahensiya sa kagamhanan ngadto sa mga nanag-iya ug establisyemento nga dili basta-basta magparada ug mga sakyanan gumikan kay kini ang usa sa nga hinungdan sa paghuot sa dagan sa trapiko.
