DAVAO CITY – Magsugod na karong adlawa ang gikahinamang Parada Dabawenyo, ang usa sa mga pinakadagkong katikaran atol sa ika-86 nga Araw ng Dabaw, diin hingpit nang mubalik ang face-to-face celebration sa maong parada nga gilaumang salmutan sa 277 ka mga grupo dinhi sa dakbayan nga maglangkub sa hangtud kinse mil ka mga tawo nga maglatas sa mga nag-unang kadalanan sa dakbayan.
Gipanugiro sa Davao City Police Office nga hugtanon gihapon ang ipatumang seguridad sa dakbayan atol sa parada. Gikanayon ni Davao City Police Office Spokesperson na si Police Major Catherine dela Rey, nga ipatuman gihapon ang pagbawal sa mga kontrabando sama sa backpack, jacket, talinis nga hinagiban, dili transparent nga mga baunanan sa tubig, ug uban pang gamit nga maghatod ug kadaot sa kasaulogan.
Mamahimo na karon ang mga mananan-away nga magsuot ug kalo tungod sa gilaumang init nga panahon. Nagpahimumdom sab si Dela Rey ngadto sa mga manan-away nga dili manigarilyo, dili magsinamok kon hubog, ug dili sab mamahimo nga magbuhi og bomb joke nga maghatod og panic sa mga manan-away.
Dugang pa ni Dela Rey nga dunay mga dagkong persoalidad nga dungan nga manan-aw sa maong parada, lakip na ang gilaumang partisipasyon nila Former President Rodrigo Duterte ug Vice President Sara Duterte.
Magpatuman og taas nga seguridad ang DCPO alang sa mga VIP nga bisita, diin duna sab augmentation sa kapulisan uban ang kaugalinong envoy sa mga VIP guests.
Alas-2 ganinang kaadlawon, gipahigayon ang soft deployment sa duha ka libo nga mga sakop sa DCPO.
Apan sa paglabay sa mga oras atol sa parada, muabot sa upat ka libo na nga mga security personnel ang ipakatag sa mga ruta nga agian sa parada sugod alas-7 sa buntag.
via || Bombo LJF
