Gipang-presenta sa hawanan sa konseho ning syudad sa Davao ang para-athletes gumikan sa nahatag niining dungog sa dakbayan ug sa rehiyon sa natapos nga 13th ASEAN Para Games sa Thailand niadtong Enero 20–26, 2026.
Gipangunahan ni Councilor Lorenzo Benjamin D. Villafuerte, chairman sa komite sa social services, ang pagresenta sa mga atleta atol sa regular session sa Sangguniang Panlungsod kagahpong adlawa aron nga pasidunggan ang ilaha ng determinasyon sa kompetisyon.
Gawas sa ASEAN Para Games, ang uban pang para-athletes ang nakigkompetensya usab sa 3rd Asian Chess Championship 2025 for Players with Disabilities ug sa World Para Athletics Grand Prix 2025, diin nakadaug pa sila og dugang medalya alang sa nasod.
Gipasabot sa konsehal nga ang kalampusan sa Davao para-athletes sa 13th ASEAN Para Games nakahatod og garbo sa nasud nga nagpakita sa walay kinutuban nga potensyal sa mga persons with disabilities.
Ang mga giprersenta atol sa sesyon mao sila Ernie Gawilan nakakuha og duha ka gold medals, usa ka silver, ug duha ka bronze medals sa para- swimming, Kendews Granaderos ug Edmond C. Montecillo alang sa para-judo nga nakadaug og bronze medal.
Samtang sa basketball, si Jannil Canete nakakuha og duha ka silver medals, samtang sa para table tennis, nakadaug og bronze medals sila Smith Billy Cartera ug Racleo Martinez Jr. Sa chess, si Henry Roger Lopez nakakuha og duha ka gold medals ug duha ka silver medals, samtang si Evangeline Gamao nakadaug og usa ka silver ug duha ka bronze medals.
Sa athletics, si Evenizer Celebrado nakakuha usab og duha ka gold medals, samtang si Arvi Arreglado nakakuha og usa ka gold, usa ka silver, ug usa ka bronze medal.
