DAVAO CITY – Gikatakdang mopailalom sa training sulod karung bulana ang mga konsehal ning siyudad ingon man ang ilang mga chief of staff isip pagpangandam sa paperless session nga magsugod na sa bulan sa Marso ning tuig kasamtangan.
Tumong sumala pa niini nga magbaton ug igong kaalam ang mga nahisgutan kalabot sa tukma nga paggamit sa laptop nga adunay mga security features aron nga maprotektahan ang ilang mga mahinungdanon nga dokumento.
Giilang dakong tabang kini sa City Council sanglit mukabat sumala pa sa 50 kilos nga papel ang ilang magamit matag panahon sa sesyon.
Gitino sab ni Vice Mayor Bernard Al-ag nga matag sesyon lamang gamiton ang laptop nga i-isyu sa mga konsehal ug dili kini mamahimong gamiton nga personal.
Gibutyag sab ni Ann Victoria Silvosa, head sa City Archive and Record Center, adunay mga security features nga angayan una nga tun-an sa mga konsehal aron nga dili ma-corrupt ang ilang mga digital certificates nga naka-install na sa mga laptops.
