DAVAO CITY – Walo sa 10 ka mga Dabawenyos o 82.9 percent ang “very satisfied” kang Pangulong Rodrigo Duterte subay sa resulta sa Ateneo de Davao University City Wide Social Service Series-9 (CWSS-9).
Nasayran sab sa survey nga 13.5 percent Dabawenyos ang satisfied; 1.4 percent dissatisfied; 0.6 percent ang very dissatisfied; ug 0.5 percent ang mibalibad sa paghatag ug tubag.
Subay sa kumbinasyon sa very satisfied ug satisfied ratings, nakaangkon ang Pangulo ug kinatibuk-ang 96.4 percent satisfaction rating nga mas taas ug susama sa milabay nga CWSS survey results.
Nakaangkon sumala pa si Pangulong Duterte ug 96.82 satisfaction ratings sa CWSS 6 nga gipahigayon sa Oktubre hangtud na Nobyembre 2016; 97.62 satisfaction rating sa CWSS 7 nga gipahigayon sa bulan sa Abril 2017; ug 97.1 rating sa CWSS 8 nga gipahigayon sa milabay nga October 2017.
Samtang layo sumala pa ang naangkon ni Vice President Leni Robredo nga anaa lamang sa 29.2 percent very satisfied rating. Samtang ang war on drugs, Build Build Build projects, ug no balance billing sa mga hospitals ang mga aksiyon nga gihimo ni Pangulong Duterte nga sagad gipili sa mga Dabawenyos.
Samtang nakaangkon sumala pa si Davao City Mayor Sara Z. Duterte-Carpio ug 89 percent nga very satisfied rating gikan sa Dabawenyos, si Vice Mayor Bernard Al-ag nakaangkon ug 44.9 percent rating; samtang ang tibuok 18th Davao City Council nakaangkon ug 53 percent rating; samtang ang mga barangay anaa sa 45.6 ang rating.
Ang CWSS gipahigayon sa milabay nga Abril 21 hangtud 26, 2018 ug gipaluyohan sa Social Research Training and Development Office (SRTDO).
