DAVAO CITY – Miduaw si Presidente Rodrigo Duterte sa iyang mitaliwan nang mga ginikanan sa mausoleo sa mga Duterte sa Davao Roman Catholic Cemetery dinhi sa Dakbayan sa Davao kagahapon sa hapon.
Mikuyog kaniya ang iyang kanhi aide ug incumbent Senator Christopher “Bong” Go. Tinuig na kining tradisyon sa Presidente, bisan pa man kaniadtong Alkalde pa siya sa Dakbayan.
Nalangan lamang karong tuiga ang Presidente tungod sa kamanduan sa Davao City LGU sa temporaryong gipasirado ang mga sam-ang gikan Oktubre 24 hangtod Nobyembre 7.
Gani, kagahapong adlawa ra usab giablihan og balik ang tanang mga minteryo ug columbarium sa Dakbayan. Hugot nga gibantayan sa Presidential Security Group kon PSG ug SWAT kon Special Weapons and Tactics Team sa Davao City Police Office ang Roman Catholic Cemetery.
Wala usab nagdugay si Presidente Duterte sa mausoleo tungod nihawa na kini gilayon human ang napulo ka minuto.
Gikabutyag usab sa Kapitan sa Barangay 8-A nga si Ariel Lagmay nga nakatakdang maghatag og usa ka libo nga grocery packs ang Presidente, apan iya kining gi-oktaba gumikan sa pagdaut sa panahon.
Dugang niya nga karong adlawa na lang kini ipahigayon.
