DAVAO CITY – Gihatagan ug pinakataas nga pasidungog sa mga sakop sa Knights of Rizal si Pangulong Rodrigo Duterte atol sa pagtambong niini sa 21st International Assembly and Conference of the Knights of Rizal (KOR) nga gipahigayon sa SMX Conventon Center Lanang ning dakbayan sa Davao.
Pasado alas siete kagabii. Malipayon nga gidawat sa Pangulo ang Knight Grand Cross of Rizal nga giilang highest degree of order.
Ang nahisgutan nga tigom usa ka pamaagi sa paghatag ug pag-ila sa mga nahimo, nasulat ug kasaysayan ni Dr. Jose Rizal ilabi na ang mga pagpakigbisog nga nahimo niini.
Sa iyang nahimong speech, gisaysay ni Pangulong Duterte ang mga maayong nabuhat ni Dr. Jose Rizal alang sa nasud ug mga unod sa gibuhat niini nga libro nga Noli me Tangere ug pagpasibaw sa mga nahitabo sa nasud pinaagi La Solidaridad.
Naglaom ang Pangulo nga unta manguna sab ang grupo sa Knights of Rizal sa kampanya nga himuong Pederalismo ang sistema sa nasud gumikan kay mismong si Dr. Jose Rizal aduna sumala pay nakitang kaayohan kaniadto kung susama nga klase ang pagdumala sa gobyerno.
Gibutyag sab sa Pangulo nga sama sa ordinaryo nga mga tawo, dili sab perpekto si Dr. Jose Rizal apan dako ang nahimong kontribusyon niini alang sa nasud.
Gikanayon sab sa chief executive nga si bisan kinsa mamahimo sab nga maila isip bayani pinaagi sa mga maayong nabuhat niini sa isig-kaingon.
