DAVAO CITY – Giduaw ni Pangulong Rodrigo Duterte ang haya sa duha ka mga sundalo nga napatay sa pagbusikad sa land mine sa Lamanan, Calinan kagahapon sa hapon.
Gipahimutang ang haya sa napatay nga duha ka mga sundalo sa Eastern Mindanao Command sa Panacan, ning dakbayan sa Davao, diin mitunol si Pangulong Duterte ug sobre nga naundan sa tabang financial kang Glysa Yadao, asawa ni Corporal Michael Yadao, ug Emily Damondon inahan ni PFC Vernel Damundon nga mga sakop sa 3rd Infantry Battalion Philippine Army nga nakabsan sa kinabuhi human nga mibusikad ang landmine nga gitanum sa mga rebeldeng NPA sa Lamanan, Calinan, ning dakbayan sa Davao.
Nasayran nga si Glysa ug Corporal Michael Yadao bag-ohay pa lamang gikasal, usa ka tuig ug lima ka bulan pa lamang. Kini bisan kung pito ka tuig na sila nga managtrato. Ang pamilyang Yadao residente sa Gabara, Opol, Misamis Oriental.
Nasayran nga gikan si Yadao sa kinse ka adlaw nga bakasyon niadtong Pebrero 1 hangtud 14 nakig-uban kini sa iyang asawa. Sa pagka-Pebrero 15 mibalik na siya sa iyang trabaho dinhi sa dakbayan sa Davao mibalik siya sa trabaho ug kagahapon sa hapon gi-landmine sila sa mga rebelde samtang padulong sa encounter site.
Bisan kung nasayud na siya sa pelegro sa trabaho sa iyang bana, apan gipahayag ni Glysa nga daw dili niya masarangan ang naghinobrang kaguol sa pagkamatay sa kapikas.
Samtang si PFC Damundon, nga taga-Koronadal City, South Cotabato kamagulangan nga anak ug bag-ong graduate pa lamang hinongdan nga labihang hilaka sa inahan, gumikan kay bisan anaa sa panggubatan sila pa gihapon ang gihuna-huna sa namatay nga sundalo.
Labihang hilaka sa inahan dihang nakita ang lungon sa iyang anak.
