Dismayado si Pang.Ferdinand Marcos Jr. human mapakyas ang pagpauli sa Pilipinas sa kanhi Ako Bicol party-list Representative nga si Zaldy Co.
Sumala kang Palace Press Officer Claire Castro, personal niyang nakaistorya ang Pangulo ug giangkon niini nga “disappointed” kini tungod hapit na unta mahitabo ang repatriation ni Co.
Apan wala kini madayon tungod sa mga mipatigbabaw nga proseso sa laing nasud nga nalambigit sa kaso.
Gipasabot sa Palasyo nga ang isyu may kalabutan sa giingong paggamit og invalid nga dokumento, hinungdan nga ang Czech Republic gihapon ang adunay hurisdiksyon sa mosunod nga mga lakang kabahin sa kaso ni Co.
Giklaro usab sa Malacañang nga wala silay nakita nga rason aron mangayo og pasaylo ang Pangulo sa publiko, bisan pa sa pagkadismaya sa pipila ka katawhan sa wala madayong pagpauli sa kanhi kongresista.
Matud pa ni Castro, gihimo sa administrasyon ang tanang angayng lakang aron maproseso ang kaso.
Gibarugan usab sa Palasyo nga walay sayop sa mga pahayag sa Pangulo nga may kalabutan sa pagkadakop kang Co sa Prague.
Samtang, naglaum ang gobyerno nga pinaagi sa mas lapad nga kooperasyon sa mga nasud ilawom sa United Nations Convention Against Corruption (UNCAC), mas mapaspasan ang proseso alang sa posibleng pagpauli sa Pilipinas sa kanhi kongresista nga nag-atubang og mga kasong may kalabutan sa korapsyon sa flood control projects.
