Gisuportahan sa grupo sa mga negosyante sa nasud ang panawagan ni Pangulong Ferdinand Marcos Jr. ngadto sa iyang mga miyembro sa gabinete nga mokanaog sa ilahang mga puwesto.
Sumala sa Management Association of the Philippines (MAP), kini nga lakang nagpakita sa paghatag ug bili sa liderato nga adunay prinsipyo ug pagpanubag. Sumala pa sa MAP, maghatag kini og positibong resulta pinaagi sa pagpatuman og mga progresibong lakang. Si MAP president Alfredo Panlilio mibutyag nga nasabtan nila ang kalisod sa maong desisyon, apan ilahang girespeto ang buhat nga gihimo sa Presidente.
Sa bahin sa sektor pribado, kasagaran usab nga ginabuhat ang pagpuli og talento aron mapaayo pa ang performance sa usa ka organisasyon. Nanghinaut na lamang ang grupo nga makakaplag gilayon ang Presidente og mga tawo nga angayan ug tukma sa ilahang mga tahas nga gimbuhaton.
