Gisupak ni Cong. Miro Quimbo, chairman sa House Committee on Ways and Means, ang panawagan nga tangtangon ang Value-Added Tax (VAT) sa lana aron mapakunhod ang presyo sa petrolyo.
Bisan pa sa padayon nga panawagan nga tangtangon kini aron mahatagan og dayon nga ginhawa ang publiko taliwala sa krisis sa gasolina, gibutyag niini nga dako kini og epekto dili lamang sa kita sa gobyerno kundili usab sa credit rating sa Pilipinas.
Sumala pa sa opisyal nga ang epekto niini, dili lamang pagkawala sa government revenue, kundili mas adunay mahinungdanon pa nga dili makita sa kadaghanan nga makaapekto sa atong credit rating.
Nagtuo siya nga importante nga mapabilin ang taas nga credit rating sa nasud tungod kay kini maoy basehan sa interest rates sa utang sa gobyerno.
Kahinumduman nga gi-aprubahan na sa Kongreso ang sugyot nga naghatag og gahum sa Presidente sa pagsuspinde o pagkunhod sa excise tax sa petrolyo panahon sa krisis.
