DAVAO CITY – Patay ang usa ka NPA Kumander sa upat ka mga panagsangka tali sa tropa sa kagamhanan ug mga New People’s Army (NPA) sa nagkada-iya nga bahin sa Region Eleven.
Sumala pa kang Major Ezra Balagtey, tigpamaba sa Eastern Mindanao Command nga ang nahisgutan nga panagsangla natigayon samtang ang 66th IB Philippine Army anaa sa combat operation sa Sitio Radio Room, Baragay Araibo, Pantukan, Compostela Valley Province.
Mikabat ngadto sa lima ka mga NPA nga sakop sa Guerrila Front 27, Southern Mindanao Regional Command (SMRC) nga gipangunahan sa usa ka alyas Lepi.
Milungtad ngadto sa napulo ka minuto ang nahisgutan nga panagsangka, dali nga miikyas ang mga rebelde human makita nga lupig sila sa kasundalohan.
Duha ka mga sundalo ang samdon sa bahin sa tropa sa kagamhanan, samtang sa bahin sa mga rebelde duha ang nangamalay nga naila nga si alyas Lepi, Front Secretary sa GF 27, SMRC ug usa ka lain pang wala maila nga NPA.
Usa ka .45 kalibre nga armas ang nakuha sa lugar.
Duna say nahitabo nga panagsangka sa Cateel, Davao Oriental tali sa 67th Infantry Batallion Philippine Army ug mga rebeldeng NPA diin tulo ka mga NPA ang patay ug lima ka mga armas sab ang nabawi sa tropa sa kagamhanan.
Samtang sa Sitio Pagan Pequiño, Barangay Tamugan, Marilog District, Davao City alas 10:00 kagahapon sa buntag nagpaka-aron-ingnon nga mga sibilyan ang mga NPA ug gisulayan ang pagbabag sa kasundalohan nga sakop sa Scout Platoon sa 3rd IB Philippine Army nga sakay sa KM450 military truck.
Una nga nagpabusikad sa ilang armas ang mga sakop sa Pulang Bagani Command (PBC) 2, Southern Mindanao Regional Command.
Bisan nga nagpabusikad ug landmine ang mga NPA nakapwesto ang kasundalohan ug wala’y nangamatay sa nahisgutan nga pagpang-ambush sa mga NPA.
