Gipahigayon kagahapon ang duha sa pinakagiatangan nga highlights sa Kadayawan Festival 2025, ang Pamulak sa Kadayawan o floral float parade ug ang Indak-Indak sa Kadayawan showdown.
Alas-sais sa buntag gisugdan ang parada sa Rizal Park diin 12 ka floats ang misalmot sa gamay nga kategoriya, unom sa dako nga kategoriya, ug napulo ka floats ang non-competing.
Ang mga dekorasyon gihimo gamit ang anahaw leaves, mga bulak ug recyclable materials, diin usa sa mga entries gibutangan pa og tibuok punoan sa saging nga nakadugang sa kalingawan sa mga nanan-aw.
Sa gabii gipahigayon ang showdown sa Indak-Indak diin ang matag contingent nagrepresentar sa tribo nga gikuhaan og inspirasyon sa ilang sayaw.
Gipasundayag niini ang ritwal, survival, pagpasalamat, sakripisyo ug kasaysayan sa mga lumad ug moro nga tribo sa Mindanao.
Aduna sab 16 ka mga contingents ang miapil, walo gikan sa mga eskwelahan ug walo usab sa open category lakip na ang delegasyon gikan sa Kapalong, Davao del Norte.
Lakip sab sa mga eskwelahan nga nakisalmot mao ang Lapu-Lapu Performing Arts Company, Daniel R. Aguinaldo Elementary School, Los Amigos Performing Arts, Indangan Performing Arts Guild, Teofilo V. Fernandez National High School, Pequeño National High School ug Sta. Ana National High School.
Sumala pa sa lokal nga kagamhanan, kapin duha ka milyon pesos ang nagasto alang sa Pamulak samtang kapin P6 Milyon ang gigahin alang sa Indak-Indak. Mitambong sab sa maong kalihukan sila Senador Ronald “Bato” dela Rosa ug Senador Christopher “Bong” Go ug uban pa nga opisyal.
Midugok usab ang liboan ka katawhan nga nanan-aw ug misaksi sa pasundayag.
Nahiusa ang tanang kalihukan sa Kadayawan Festival 2025 ubos sa tema nga nagpasidungog sa kultura ug katawhan sa Davao.
